Dálkkádatrievdan lea globála váttisvuohta mii ii dovdda riikkarájiid. Danne fertet mii maiddái gávdnat globála čovdosiid. Lassin dasa ahte unnidit luoitimiid ja čohkket ja vurket CO2, ferte baicca guoddevaš energiija ja eará buhtes energiija geavahuvvot.
ON dálkkádatpanela dutkit oaivvildit ahte luondu ii gierdda eambbo liegganit go guokte gráda.
Jus lieggana eambbo de ii leat šat vejolaš bissehit dálkkádatrievdamiid. Dálkkádatnjunnošiid čoahkkimis Parisas 2015:s sohpe máilmmi jođiheaddjit ođđa šiehtadusa. Dat geatnegahttá riikkaid dahkat dan maid sáhttet vai máilbmi ii lieggan eambbo go guokte gráda, ja áinnas ii eambbo go 1,5 gráda.
13.1 Nannet buot riikkaid návccaid vuosttildit dálkkádatrievdamiid ja heivehit iežaset birasváraide ja luondduroasuide.
13.2 Mearridit doaibmabijuid dálkkádatrievdamiid vuostá nationála dási politihkkii, strategiijaide ja plánaide.
13.3 Nannet ovttaskas olbmuid ja ásahusaid návccaid unnidit dálkkádatgássaid luoitima, unnidit dálkkádatrievdamiid ja heivehit iežaset daid váikkuhusaide, nannet sin návccaid árrat dieđihit, ja maiddái nannet oahpu ja diđolašvuođa dáid birra.
13.a Čađahit ON rámmakonvenšuvnna dálkkádatrievdamiid birra masa ovdánan riikkat leat geatnegahttán iežaset olahit mihttomeari 2020 rádjai ovttas ja jahkásaččat čoaggit 100 miljárdda dollára buot gálduin, vai sáhttá ovdánahttinriikkaid veahkehit álggahit ja rahpasit čađahit ulbmillaš dálkkádatdoaibmabijuid, ja nu jođánit go vejolaš doarjut ruđalaččat Ruoná dálkkádatfoandda (The Green Climate Fund), vai dat boahtá johtui.
13.b Ovddidit mekanismmaid mat nannejit effektiiva plánema ja hálddašeami dálkkádagaid hárrái dain unnimusat ovdánan riikkain ja smávit suolostáhtain, ja mat earret eará vuoruhit nissonolbmuid ja nuoraid, ja báikkálaš ja marginála servodagaid.
* Dan dovddastusa vuođul ahte ON rámmakonvenšuvdna dálkkádatrievdamiid hárrái lea dat deháleamos internationála ja riikkaidgaskasaš forum šiehtadallat globála doaibmabijuid dálkkádatrievdamiid vuostá.