Buorre oahppu lea olbmuid eallima buorideami vuođđu. Sihke nieiddaide ja bártniide galgá oahppu mas lea buorre kvalitehta leat olámuttos, ja dat galgá leat nuvttá.
Mánáid lohku mat leat skuvllas lea lassánan hirbmosit. Nieiddaid ja nissonolbmuid lohku lea lassánan erenomáš olu. Gelbbolašvuohta lohkamis ja čállimis lea maid buoriduvvon. Lihkká leat áin beare oallugat geat eai máhte lohkat ja čállit.
4.1 2030 rádjai galgá nuvttá ja dásseárvosaš vuođđoskuvlla ja joatkkaskuvlla oahppu sihkkarastojuvvot buot nieiddaide ja bártniide, mii lea buori kvalitehtas, ja mii addá relevánta ja albma oahppanbohtosa.
4.2 2030 rádjai galgá buot nieiddaide ja bártniide sihkkarastojuvvot vejolašvuohta árra ja buori ovdáneapmái ja fuolahussii ja ahte ovdaskuvla lea olámuttos, vai leat gergosat vuođđoskuvlii álgit.
4.3 2030 rádjai galgá nissonolbmuide ja dievdoolbmuide sihkkarastojuvvot ovttadássásaš ja buorre teknihkalaš ja fidnofágalaš oahppu ja alit oahppu, maiddái universitehtaoahppu, mii ii leat badjelmeare divrras.
4.4 2030 rádjai galgá olahuvvot mearkkašáhtti lassáneapmi nuorain ja rávisolbmuin geain lea gelbbolašvuohta, earret eará teknihkalaš ja fidnofágalaš gelbbolašvuohta, mii lea relevánta sihke barggu oažžumii, ávddalaš bargui ja fidnohutkkálašvuhtii.
4.5 2030 rádjai galget sohkabealerohusat oahpus ja oahpaheamis jávkaduvvot ja buohkain galget leat ovttalágan
vejolašvuođat buot oahppodásiin ja fidnofágalaš oahpus, maiddái hearkkes olbmuin nugo doaimmashehttejuvvon olbmuin, álgoálbmogiin ja mánáin hearkkes diliin.
4.6 2030 rádjai galgá sihkkarastojuvvot ahte buot nuorat ja eanas rávisolbmot, sihke nissonolbmot ja dievdoolbmot, ohppet lohkat, čállit ja rehkenastit.
4.7 2030 rádjai galgá sihkkarastojuvvon ahte oahppit ja studeanttat olahit dan gelbbolašvuođa mii lea dárbbašlaš ovddidit guoddevaš ovdáneami, earret eará oahpu bokte guoddevaš ovdáneami ja eallindábiid, olmmošvuoigatvuođaid ja dásseárvvu birra, ja oahpu bokte mii ovddida ráfi, ii ge riiddu, oahpu bokte mii ovddida globála servvodatmiellahttuvuođa ja árvvus atná kultuvrralaš girjáivuođa ja dan movt kultuvrrat váikkuhit guoddevaš ovdáneapmái.
4.a Ásahit ja ođastit oahppofálaldagaid mat leat heivehuvvon mánáide, ja vuhtiiváldet sohkabealerohusaid ja doaimmashehttejuvvon olbmuid. Ja mat sihkkarastet dorvvolaš, ráfálaš, searvadahtti ja beaktilis oahppobirrasa buohkaide.
4.b 2020 rádjái galget stipeanddat studeanttaide ovdánahttinriikkain globálalaččat lassánan mearkkašáhtti olu, erenomážit dain riikkain mat leat unnimusat ovdánan, ovdánahttinsuolostáhtain ja Afrihká riikkain, vai alit oahppu šaddá olámuttos, earret eará fidnofágalaš oahput ja prográmmat diehto- ja gulahallanteknologiijas, teknihkas, inšenevrafágain ja dieđalaš oahpuin. Dát alit oahppu galgá leat olámuttos sihke eará ovdánahttinriikkaide ja riikkaide mat leat ovdánan.
4.c 2030 rádjai galget gelbbolaš oahpaheaddjit lassánit mearkkašahtti olu, earret eará dan bokte ahte internationála dásis ovttasbargat oahpaheaddjeoahpu ovddidemiin ovdánahttinriikkain, erenomážit dain riikkain mat leat unnimusat ovdánan ja ovdánahttinsuolostáhtain.