Sihkkarastit ráfi ja sihkarvuođa lea álo leamaš ON váldomihttu. Danne lea 16. mihttomearri várrejuvvon dasa ahte ráhkadit ráfálaš ja searvadahtti servodagaid. Guoddevaš ovdáneapmi eaktuda ráfi. Oallugat masset almmolaš bálvalusaid go leat stuimmit. Lea maiddái váttis doaimmahit nanu stáhtalaš ásahusaid go leat stuimmit. Go riektevuogádat riikkas ii doaimma, de čuohcá dát olbmuid riektesuodjalussii. Hearkkes ásahusaid geažil lea maid váttis bissehit korrupšuvnna, duolguma ja vearroverrošeami. Dat hehtte riikka ekonomalaš ovdáneami ja rivve olbmuin buori dilálašvuođa vuođđorivttiid.
16.1 Unnidit buotlágan veahkaválddálašvuođaid ja jámu veahkaválddálašvuođa geažil mearkkašáhtti láhkái miehtá máilmmi.
16.2 Bissehit mánáid illasteami, geavaheami, vuovdima ja buotlágan veahkaválddálašvuođa ja biinnideami.
16.3 Ovddidit riektestáhta nationála ja internationála dásis, ja sihkkarastit buohkaide dásseárvvu lága ovddas, riektesihkarvuođa ja riektesuodjalusa.
16.4 2030 rádjai unnidit lobihis finánsa- ja vearjorávnnjiid mearkkašahtti láhkái, ja álkidit suolagálvvu guorrama ja máhcaheami ja vuostálastit buotlágan organiserejuvvon kriminalitehta.
16.5 Mearkkašahtti láhkái unnidit buotlágan korrupšuvnna ja duolguma.
16.6 Ovdánahttit effektiiva, ovddasvástideaddji ja rabas ásahusaid buot dásiin.
16.7 Sihkkarastit guldaleaddji, searvadahtti, oassálasti ja ovddasteaddji mearridanproseassaid buot dásiin.
16.8 Viiddidit ja nanosmahttit ovdánahttinriikkaid searvama globála stivrenásahusaide.
16.9 2030 rádjai galgá buohkaide sihkkarastojuvvot juridihkalaš identitehta, earret eará galgá riegádeapmi registrerejuvvot.
16.10 Sihkkarastit ahte dieđut leat olámuttos buohkaide ja ahte vuđolaš friddjavuohta suodjaluvvo, nationála lágaid ja internationála šiehtadusaid vuođul.
16.a Nannet relevánta nationála ásahusaid, earret eará internationála ovttasbarggu bokte, dainna ulbmilin ahte hukset kapasitehta buot dásiin, erenomážit ovdánahttinriikkain, vai nagodit eastadit veahkaválddálašvuođa ja vuostálastit terrorisma ja kriminalitehta.
16.b Ovddidit ja čađahit vealatkeahtes lágaid ja politihka guoddevaš ovdáneapmin.